آخیر حرف

سککیزینجی درس: سؤزلرین سون حرفی

یازار : اورمولو

آزربایجان تۆرکجه‌سی‌نین سؤزلری ائشیدیلدیگی کیمی یازێلێر (فونئتیک‌دیر).

آخێرێ «ق Q» یا «غ Ğ» ویا «خ X» تلفّۆظ اولان سؤزلر، اگر تک‌هئجالی اولسالار، «غ Ğ» یا «خ X» و اگر ایکی هئجالی ویا چوخ‌هئجالی اولسالار، «ق Q» شکلینده یازێلێر. اؤرنک: چوخ Çox، یاغ Yağ، باخ Bax، زێغ Zığ، توخ Tox /// اوُشاق Uşaq، قاچماق Qaçmaq، قێشلاق Qışlaq، پارلاق Parlaq.

قالێن سسلی آناسؤزلر(مصدرلر) «ق Q»، اینجه سسلی‌لر ده «ک K» ایله‌ن بیتَر. اؤرنک: یازماق Yazmaq، اولماق Olmaq، یئمَک Yemək، سؤنمک Sönmək.

سؤزلرین آخێرێنداکێ «ق Q» حرفی، ایکی سسلی آراسێنا دۆشسه، «غ Ğ» حرفینه چئوریلَر. اؤرنک: باشماق+ێم= باشماغێم Başmaq+ım=Başmağım

ایکی ویا چوخ هئجالی سؤزلرین سونونداکێ «ت T» حرفی، ایکی سسلی آراسێنا دۆشَنده، «د D» حرفینه چئوریلیر. اؤرنک: اوُنوُت+وُر= اونودور Unut+ur= Unudur، قاچێرت+ێر= قاچێردێر Qaçırt+ır= Qaçırdır

سؤزلرین سونونداکێ «ک K» حرفی، ایکی سسلی آراسێنا دۆشنده، «گ G» ویا «ی Y» حرفینه چئوریلیر. اؤرنک: چؤرَک+ین= چؤرَگین(چؤرَیین) Çörək+in= Çörəgin Çörəyin، امَک+ینیز= امَگینیز(امَیینیز) Əmk+iniz= Əməginiz Əməyiniz

قایناق: قێساجێق آذربایجان تۆرکجه‌سی حاقّێندا، کۆیلۆ سعید نجّاری

آچار سؤزلر : یازماق اوصولو, آخیر حرف, سسلر, یازی قایدالاری,